Неопходно е да се означи Русија како државен спонзор на тероризмот и да се зајакнат санкциите, особено поради нејзините воздушни напади врз енергетската инфраструктура на Украина, изјави украинскиот претседател Володимир Зеленски во своето синоќешно видео обраќање.
„Вчера и денеска руската армија ја погоди украинската енергетска инфраструктура. Стотици илјади Украинци се најдоа во мрак – без струја. Куќи, болници, училишта, општинска инфраструктура… Руските проектили гаѓаа објекти кои немаат никаква врска со инфраструктурата на вооружените сили на нашата земја“, рече тој.
Според него, тоа е знак на очајот на оние кои ја започнаа оваа војна. Вака реагираат на поразот на руските сили во областа Харкив.
„Тие не можат ништо да им направат на нашите херои на бојното поле, и затоа Русија ги насочува своите гнасни напади против цивилната инфраструктура“, рече Зеленски.
„Од друга страна, Русија се обидува да не спречи да ги канализираме можностите на Украина со цел да се стабилизира ситуацијата во Европа. Нашиот извоз на електрична енергија е она од што Русија многу се плаши во моментов. Затоа што можеме да ги скршиме руските планови за празнење на џебовите на Европејците оваа зима поради лудите цени на енергијата… Допрва треба да ја зајакнеме нашата соработка за да го надминеме рускиот терор“, додаде тој.
За да се направи ова, според неговото мислење, неопходно е да се означи Русија како државен спонзор на тероризмот.
„Да се зајакнат санкциите – потребен е осмиот пакет санкции на ЕУ. Неопходно е да се зголеми помошта за Украина, пред сè, за да се забрза обезбедувањето системи за противвоздушна одбрана за нашата земја“, рече Зеленски.
